പക്ഷേ ഒരുനാള്‍ പെട്ടെന്ന് - കൃത്യമായി പറഞ്ഞാല്‍ 1492 മുതല്‍ എല്ലാം തകിടം മറിഞ്ഞു. ദശാബ്ദങ്ങളോളം ഒരു ചെറു സംഘം സ്വയം പ്രഖ്യാപിത "ജ്ഞാനികള്‍" ഭൂമി ഉരുണ്ടതാണെന്ന അസംബന്ധം പ്രചരിപ്പിച്ചു നടന്നു. അതിന് ഉപോല്‍ബലകമായി അവര്‍ അവതരിപ്പിച്ച തെളിവുകള്‍ സ്വന്തം ഭാവനാസൃഷ്ടികളോ അര്‍ത്ഥസത്യങ്ങളോ അന്ധമായ ഊഹാപോഹങ്ങളോ ആയിരുന്നു. പക്ഷേ അവയെ "എതിര്‍ക്കാനാവാത്ത ഗണിതശാസ്ത്ര - ഭൗതികശാസ്ത്ര തെളിവുകള്‍" ആയി അവതരിപ്പിച്ചുകൊണ്ടാണ് അവര്‍ ലോകം ഒരു ചപ്പാത്തി പോലെ അല്ല മറിച്ച് ഉണ്ടമ്പൊരി പോലെ ആണെന്ന് പ്രഖ്യാപിച്ചത്!
ഈ ഉണ്ടമ്പൊരിവാദികളെ നിശ്ശബ്ദരാക്കാനോ ഇല്ലാതാക്കാനോ ആദ്യകാലങ്ങളില്‍ കഴിഞ്ഞിരുന്നു. എങ്കിലും ഒരു ചെറു വിഭാഗം പ്രപഞ്ചകേന്ദ്രത്തെ സംബന്ധിച്ച ഈ ദൈവനിന്ദ തുടര്‍ന്നും പ്രചരിപ്പിച്ചു കൊണ്ടിരുന്നു. അവരിലൊരാള്‍ - ക്രിസ്ടഫര്‍ കൊളംബസ് - താന്‍ പടിഞ്ഞാറോട്ട് സഞ്ചരിച്ച് കിഴക്കന്‍ രാജ്യമായ ഭാരതത്തിലെത്തി എന്ന നുണ പറഞ്ഞ് ജനങ്ങളെ വിശ്വസിപ്പിച്ചു. എന്നാല്‍ നമുക്ക് ഇന്നറിയാം ആ വ്യക്തി എത്തിയത് ഭാരതത്തിലല്ല, മറിച്ച് അന്നു വരെ കണ്ടെത്തിയിട്ടില്ലാതിരുന്ന ഒരു പടിഞ്ഞാറന്‍ ഭൂഖണ്ഡത്തില്‍ മാത്രമായിരുന്നു. ആ സത്യം തിരിച്ചറിഞ്ഞപ്പോഴേയ്കും വളരെ വൈകിപ്പോയിരുന്നു. ഭൂമി ഉരുണ്ടതാണെന്ന അസംബന്ധം ഭൂരിപക്ഷം ജനങ്ങളും അന്ധമായി വിശ്വസിച്ചു കഴിഞ്ഞിരുന്നു. അതോടെ മനുഷ്യവംശം ഒരു 'ഇരുണ്ട യുഗ'ത്തിലേയ്ക്ക് പ്രവേശിച്ചു.
പക്ഷേ എല്ലാ പ്രതീക്ഷകളും ഇനിയും നഷ്ടപ്പെട്ടിട്ടില്ല. നമ്മുടെ ഗ്രഹത്തിന്റെ രൂപത്തെക്കുറിച്ചുള്ള പ്രാചീനവും സത്യവുമായ ആ അറിവ് ജാഗ്രതയോടുകൂടി ഒരു ചെറു കൂട്ടം വ്യക്തികള്‍ നിലനിര്‍ത്തി. ഇപ്പോള്‍, നൂറ്റാണ്ടുകള്‍ നീണ്ടുനിന്ന ഇരുണ്ടയുഗത്തിനു ശേഷം ഇതാ ആ സത്യത്തെ സ്വീകരിക്കാന്‍ ജനങ്ങള്‍ പ്രാപ്തരായിത്തീര്‍ന്നിരിക്കുന്നു.
